हजारो बेरोजगार युवक -युवतींना रोजगार मिळाल्याचे समाधान मोठे :आमदार हसन मुश्रीफ यांचे प्रतिपादन ; सर्वच स्पर्धा परीक्षांचे प्रशिक्षण सुरू ठेवणार
कागल प्रतिनिधी : विजय मोरबाळे
गेल्या ३० ३५ वर्षाच्या राजकीय व सामाजिक वाटचालीमध्ये हजारो बेरोजगार युवक- युवतींना रोजगार मिळवून दिला. फाउंडेशनच्या माध्यमातून विविध स्पर्धा परीक्षांच्या प्रशिक्षणांमधून हजारो तरुण-तरुणींना नोकऱ्या मिळाल्या. याचे आत्मिक समाधान मोठे आहे, असे प्रतिपादन आमदार हसनसाहेब मुश्रीफ यांनी केले.
कागलमध्ये आमदार हसन मुश्रीफ फाउंडेशनच्या पोलीस भरती प्रशिक्षणाच्या माध्यमातून मुंबई पोलीस दलामध्ये भरती झालेल्या ६७ युवक- युवतींच्या सत्कार व शुभेच्छा कार्यक्रमात आमदार श्री. मुश्रीफ बोलत होते.
भाषणात आमदार श्री. मुश्रीफ पुढे म्हणाले, गेल्या ३० वर्षात हजारो कुटुंबांना हक्काची भाकरी मिळवून देऊ शकलो, याचा आनंद फार मोठा आहे. केडीसीसी बँक असेल, केडर असेल, शिक्षण खाते, दूग्धविकास खाते- महानंद, तसेच राज्यातील पोलीस भरती आणि कागलच्या पंचतारांकित एमआयडीसीमध्ये हजारो बेरोजगारांच्या हाताला रोजगार मिळवून देण्यात यश मिळाले.
वडाच्या झाडाची सावली…….
मुंबई पोलीस दलात भरती झालेला निलजी ता. गडहिंग्लज येथील अमर नारायण परीट म्हणाला, आज वटपौर्णिमा आहे. आमदार हसनसाहेब मुश्रीफ हेच एक वटवृक्ष आहेत. वडाच्या झाडाप्रमाणेच जनतेवर त्यांची सावली आहे. आमच्यासमवेत आमच्या आई-वडिलांचाही सत्कार झाला. या सत्कारापेक्षा अन्य कोणताही मोठा सत्कार नाही, असेही तो म्हणाला.
गोरगरिबांच्या बाजूने उभे रहा……
भाषणात आमदार श्री. मुश्रीफ म्हणाले, पोलीस दलात सेवा बजावताना प्रामाणिकपणाने व निष्ठेने काम करा. आई -वडील व सासू-सासर्‍यांची सेवा करा. न्याय व अन्यायाच्या लढाईत सदैव गोरगरिबांच्या बाजूने उभे रहा, असेही ते म्हणाले.
स्वागत व प्रास्ताविकपर भाषणात फाउंडेशनचे अध्यक्ष व गोकुळ दूध संघाचे संचालक नवीद मुश्रीफ म्हणाले, गेल्या पंधरा-वीस वर्षापासून फाउंडेशन विविध सामाजिक उपक्रमांमध्ये नेहमीच अग्रेसर आहे. विविध स्पर्धा परीक्षांच्या प्रशिक्षणातून फाउंडेशनच्यावतीने आतापर्यंत नोकरीमध्ये नियुक्ती झालेल्यांची संख्या दोन हजाराहून अधिक आहे.
केडीसीसी बँकेचे संचालक प्रताप उर्फ भैया माने म्हणाले, आमदार हसनसाहेब मुश्रीफ यांनी कायमच बेरोजगारी हटवून रोजगार उभे करण्याला व नोकऱ्या लावण्याला प्राधान्य दिले. हाच खऱ्या अर्थाने शाश्वत विकास आहे.
या कार्यक्रमात कागल केंद्राचे प्रशिक्षक आप्पासाहेब पाटील व सखाराम राजुगडे यांचे सत्कार झाले. तसेच; गडहिंग्लज केंद्राचे प्रशिक्षक योगेश पाटील व सौ. बिरेंदर अडसुळे यांचेही सत्कार झाले.
यावेळी गोकुळ दूध संघाचे संचालक युवराजबापू पाटील, बिद्री कारखान्याचे संचालक प्रविणसिंह पाटील, केडीसीसी बँकेचे संचालक प्रताप उर्फ भैया माने, शशिकांत खोत, शामराव पाटील – यमगेकर, दिनकर कोतेकर, कृष्णात पाटील, जीवनराव शिंदे, सूर्यकांत पाटील, धनाजी तोरस्कर, डी एम चौगुले, जगदीश पाटील, रमेश तोडकर, कागल तालुका राष्ट्रवादी काँग्रेसचे अध्यक्ष विकास पाटील, रंगराव पाटील, अशोकराव नवाळे, ज्योती मुसळे, नारायण पाटील, दत्ता पाटील – केनवडेकर, संजय चितारी, ॲड. संग्राम गुरव आदी प्रमुख उपस्थित होते.
