कोळसा घोटाळा प्रकरणी राज्यसभेचे माजी खासदार विजय दर्डांना दिल्ली उच्च न्यायालयाकडून अंतरिम जामीन मंजूर

राज्यसभेचे माजी खासदार विजय दर्डा यांना छत्तीसगडमधील कोळसा खाण वाटप घोटाळा प्रकरणात शिक्षा सुनावण्यात आली आहे. दिल्ली विशेष न्यायालयाने विजय दर्डा यांना कोळसा घोटाळा प्रकरणात चार वर्षांच्या तुरुंगवासाची शिक्षा सुनावली होती. विजय दर्डा, मुलगा देवेंद्र दर्डा यांना बुधवारी (दि. 26) चार वर्षाच्या तुरुंगवासाची शिक्षा कोर्टाने सुनावली होती. याप्रकरणी विजय दर्डा आणि त्यांचा मुलगा देवेंद्र दर्डा यांच्यासह आणखी एका आरोपीला दिल्ली उच्च न्यायालयाने अंतरिम जामीन मंजूर केला आहे.

1999 ते 2005 या कालावधीमध्ये जेएलडी यवतमाळ यांना जे जुने ब्लॉक देण्यात आले होते त्याची माहिती लपवून पुन्हा यूपीए सरकारच्या काळात गैरमार्गाने कंत्राट मिळवल्याचा आरोप होता.यूपीए सरकारच्या काळात गाजलेल्या घोटाळ्यांमध्ये कोळसा घोटाळ्याचे नाव प्रामुख्याने घेण्यात येते.

दिल्लीतील विशेष न्यायालयाने बुधवारी राज्यसभेचे माजी खासदार विजय दर्डा यांच्यासह मुलगा देवेंद्र दर्डा आणि जेएलडी यवतमाळ एनर्जी प्रा. लि. चे संचालक मनोजकुमार जयस्वाल यांना कोळसा घोटाळा प्रकरणी चार वर्षांची शिक्षा सुनावली होती. तसेच याच प्रकरणात निवृत्त कोळसा सचिव एच.सी.गुप्ता , दोन ज्येष्ठ अधिकारी के एस क्रोफा आणि के सी समरीया यांना तीन वर्षांच्या तुरुंगवासाची शिक्षा सुनावण्यात आली होती.

राउज एवेन्यू कोर्ट के विशेष न्यायाधीश संजय बंसल यांनी 13 जुलै रोजी माजी खासदार विजय दर्डा आणि मुलगा देवेंद्र दर्डा, माजी कोळसा सचिव एच सी गुप्ता, के एस क्रोफा, के सी सामरिया हे दोन प्रशासकीय अधिकारी, जेएलडी यवतमाळ एनर्जी प्रा. लि. चे संचालक मनोज कुमार जैस्वाल
यांना दोषी ठरवलं होतं. विशेष न्यायालयाने त्यांना आयपीसी कलम 120 बी, 420 आणि भ्रष्टाचार प्रतिबंधक कायद्याच्या इतर कलमांखाली दोषी ठरवलं. या प्रकरणी शिक्षेची सुनावणी 18 जुलै रोजी होणार होती.परंतु 26 जुलै रोज शिक्षा सुनावणी झाली. ज्यात त्यांना चार वर्षाचा तुरुंगवास ठोठावण्यात आला.