‘महाराष्ट्र मिशन ड्रोन’ प्रकल्पाला तत्वतः मान्यता : उपमुख्यमंत्री देवेंद्र फडणवीस

राज्य सरकारचे विविध विभाग आपल्या वेगवेगळ्या उपक्रम आणि योजनांसाठी ड्रोन तंत्रज्ञानाचा उपयोग करत असतात. पण, आता भविष्यामध्ये यात आणखी समन्वयाची आवश्यकता भासणार असून त्यासाठी ‘महाराष्ट्र मिशन ड्रोन’ प्रकल्पाला तत्वतः मान्यता देण्यात येत असल्याची माहिती राज्याचे उपमुख्यमंत्री देवेंद्र फडणवीस यांनी दिली आहे.

सह्याद्री राज्य अतिथीगृह येथे महाराष्ट्र ड्रोन मिशनबाबत नुकत्याच झालेल्या बैठकीत  ‘महाराष्ट्र मिशन ड्रोन’ला तत्वतः मान्यता देण्यात आली आहे.  उपमुख्यमंत्री देवेंद्र फडणवीस म्हणाले, “सध्या ‘आयआयटी’ येथे या मिशनची सुरूवात करण्यात यावी, नंतर यामध्ये अधिक सुसुत्रता आणून शेतीच्या विविध कामांचे पूर्ण चक्र आपण याद्वारे संनियंत्रण करु शकतो”, असं ते म्हणाले.

तसेच शेती क्षेत्रासाठी हे मिशन अत्यंत उपयुक्त ठरणार आहे. कृषी क्षेत्रात या तंत्रज्ञानामुळे मोठे बदल घडू शकतात. या प्रकल्पाचा सविस्तर प्रस्ताव सादर करण्याचे तसेच यासंदर्भातील आदर्श कार्यपद्धती (SOP) तयार करण्याचे निर्देशही उपमुख्यमंत्री देवेंद्र फडणवीस यांनी प्रशासनाला दिले आहेत.

जागतिक दर्जाचे ड्रोन हब तयार करणे, मुख्यालय स्थापन करणे, त्याचे विकेंद्रीकरण करणे, या सर्व यंत्रणा उभारण्यासाठी पायाभूत सुविधा निर्माण करणे, ड्रोन पोर्ट तयार करणे, या क्षेत्रात कुशल मनुष्यबळाची निर्मिती करणे, एकात्मिक यंत्रणा उभारणे, ही कामे याअंतर्गत करण्यात येणार आहेत. विविध क्षेत्रासाठी हे तंत्रज्ञान उपयुक्त ठरेल, उद्योग क्षेत्रालाही-रोजगार निर्मितीलाही याद्वारे चालना मिळू शकणार आहे, अशी माहिती यावेळी देण्यात आली