“कागल बझार “च्या रूपाने महिला उद्योजकांसाठी कागल मध्ये पहिले व्यासपीठ : समरजितसिंह घाटगे “शाहू ग्रुप “च्या आणखी एका सेवादालनाचा शुभारंभ

कागल प्रतिनिधी : 

कागल बझारच्या रूपाने बचत गटांसह उद्योजक महिलांसाठी कागल तालुक्यातील पहिलेच व्यासपीठ निर्माण झाले आहे. असे प्रतिपादन शाहू साखर कारखान्याचे चेअरमन व भाजपाचे जिल्हाध्यक्ष राजे समरजितसिंह घाटगे यांनी केले.
शाहू कृषी सोसायटी संचलित येथील बापुसाहेब महाराज चौकातील दूधगंगा डेअरीच्या गाळ्यातील “कागल बझार” या डिपार्टमेंटल स्टोअरच्या उद्घाटनावेळी ते बोलत होते.

शाहू ग्रुपच्या मार्गदर्शिका व शाहु साखर कारखान्याच्या संचालिका श्रीमती सुहासिनीदेवी घाटगे यांच्या हस्ते या बझारचे उद्घाटन झाले. यावेळी श्रीमती घाटगे यांच्या हस्ते पाच ग्राहकांना क्रेडिट पासबुकचे वितरणही केले .

श्री घाटगे पुढे म्हणाले, स्व,विक्रमसिंहराजे घाटगे नेहमी म्हणत की, स्पर्धेच्या युगात एखादी संस्था टिकून राहावयाची असेल तर बदलत्या परिस्थितीचा वेध घेत संस्थेने वेगवेगळे पर्याय शोधले पाहिजेत ज्यामध्ये संस्थेचे सभासद,व सर्वसामान्यांचे हित दडले आहे.त्याचेच हे पुढचे पाऊल आहे. 2019 च्या विधानसभेच्या निवडणुकीच्या प्रचाराच्या वेळी राजमाता जिजाऊ महिला समितीच्या कार्याध्यक्षा सौ. नवोदिता घाटगे यांनी महिला सक्षमीकरणसाठी बचत गटांना प्रोत्साहन देण्यासाठी स्वतंत्र व्यासपीठ उपलब्ध करून देऊ असे बोलल्या होत्या. त्यांनी तो शब्द खरा करून दाखवला आहे.या माध्यमातून बचत गटासह उद्योजक महिलांच्या उत्पादनांना चांगली बाजारपेठ मिळून त्यांना आर्थिक पाठबळ मिळेल.

राजमाता जिजाऊ महिला समितीच्या कार्याध्यक्षा सौ. नवोदिता घाटगे म्हणाल्या, बचत गटासह उद्योजक महिलांसमोर त्यांनी उत्पादित केलेली उत्पादने विकायची कुठे याची मोठी समस्या आहे.यावर कागल बझारच्या रूपाने आम्ही उद्योगी महिलांसाठी चांगला पर्याय उभा केला आहे. त्याच्या भविष्यात मुरगुड ,गडहिंग्लज व जिल्ह्यात शाखा सुरू करण्याचा मनोदय आहे.त्यासाठी सर्वसामान्य ग्राहक हेच आमचे ब्रँड ॲम्बेसिडर असतील. शाहू ग्रुपच्या या सेवा दालनाचा सर्व नागरिकांनी ,महिलां उद्योजकानी,लाभ घ्यावा. असे आवाहनही त्यांनी केले.

यावेळी श्री. शाहू कृषी सोसायटीचे चेअरमन अनंत फर्नांडिस, सर्व संचालक ,कार्यकारी संचालक समीर नाळे ,शाहू कारखान्याचे व्हाईस चेअरमन अमरसिंह घोरपडे व सर्व संचालक, राजे बँकेचे चेअरमन एम पी पाटील व सर्व संचालक,दूधगंगा डेअरीचे चेअरमन अजितसिंह घाटगे व सर्व संचालक यांच्यासह नगरसेवक नगरसेविका व शाहू ग्रुप मधील विविध संस्थांचे पदाधिकारी उपस्थित होते .

स्वागत शाहू कृषीचे उपाध्यक्ष अरुण शिंत्रे यांनी केले.आभार संचालक रामचंद्र खराडे यांनी मानले.

महिला उत्पादनांसाठी स्वतंत्र कक्ष

“शाहू ग्रुप” च्या नवीन सेवा दालनामध्ये मध्ये चांगल्या दर्जाच्या सर्व जीवनावश्यक वस्तू उपलब्ध आहेत. त्याशिवाय त्यामध्ये महिला बचत गटातील सहभागी महिलांच्या उत्पादनांसाठी व इतर महिला उद्योजकासाठी स्वतंत्र कक्ष आरक्षित केला आहे.त्यामुळे महिला बचत गट व महिला उद्योजकांसाठी त्यांनी बनविलेल्या मालाच्या विक्रीसाठी चांगली बाजारपेठ बाजारपेठ मिळावी हाच उद्देश आहे. याचा फायदा महिला बचत गट व महिला उद्योजकांनी घ्यावा.