बाळूमामांचा राजवाडा पाहायला दुनियेतील लोक येतील , आदमापूर प्रति पंढरपूर होईल ; संत बाळूमामा मंदिरात कृष्णात डोणे महाराज यांची भाकणूक

मुरगूड प्रतिनिधी : विजय मोरबाळे

लाखो भाविकांचे श्रद्धास्थान असलेल्या श्री. क्षेत्र आदमापूर ता. भुदरगड येथील बाळूमामांचा वार्षिक भंडारा उत्सव विविध कार्यक्रमांनी लाखो भाविकांचे उपस्थिती मध्ये पार पडला. भंडारा उत्सवात जागरा दिवशी पहाटे मुख्य भाकणूककार कृष्णात डोणे वाघापुरे महाराज यांच्या अमृतवाणीतुन भाकणूक कार्यक्रम पार पडला.

कृष्णात डोणे यांची भाकणूक पुढीलप्रमाणे :

पृथ्वीचा करार संपत आला आहे. सूर्य, चंद्र काही वर्षांनी एकत्र येतील. चंद्र सूर्याची टक्कर होईल, तीन दिवस जगात अंधार राहील. पृथ्वी गडप होईल. सांभाळून राहा. तारणाऱ्याला तारणार, मारणाऱ्यांना मारणार, कळपातला शोधून काढणार. शिक्षा होणार. ज्याच्या अंगी भक्ती तो सुखाने खाणार, बाळूमामाचे आदमापूर प्रति पंढरपूर होईल. बाळू धनगराचा राजवाडा पाहायला जग दुनियातून लोक येतील, अशी भविष्यवाणी कृष्णात बाबुराव डोणे पुजारी वाघापूरकर यांनी केली. या मराठी वर्षातील ही शेवटची अन् महत्वाची भाकणूक आहे.

कृष्णात डोणे पुढे म्हणाले की, भारत – पाकिस्तानच्या सीमेवर छुपे युद्ध सुरू राहील. चीनचा भारतावर हल्ला होईल. कोरिया – चीन देश जगासाठी क्लेशदायक ठरतील. भारतावर आक्रमण करतील. भारतीय सैनिक हल्ले परतवून लावतील. विजयी पताका फडकवतील. तिरंगा ध्वज आनंदात राहील. अनेक देश हिंदू धर्माची स्थापना करतील. हिंदू संस्कृतीचा स्वीकार करतील. हिंदू धर्माला चांगले दिवस येतील. भारत देश हिंदूराष्ट्र होईल. देश व राज्याच्या राजकारणात मोठा गोंधळ होईल. राजकारणी नेतेमंडळी या पक्षातून त्या पक्षात कोलांट उड्या मारतील. राजकारणी सत्ता, संपत्तीच्या मागे लागतील. सत्तेच्या बाजारात राजकीय नेते विकत मिळतील. पक्षनिष्ठा घाण ठेवतील. राजकारणात पैसे न खाणारा राजकीय नेता सापडणार नाही. दिल्लीच्या गादीसाठी मोठी चढाओढ लागेल. राज्याच्या राजकारणात गोंधळ होईल. सत्तेचे सिंहासन डळमळीत राहील. राजकारणात लोक देवा, धर्माला विसरून जातील. भ्रष्टाचार उंदड होईल. नेतेमंडळी तुंरुगात जातील. महाराष्ट्राच्या राजकारणात उलथापालथ होईल. सीमा भागात मोठा गोंधळ होईल. गुंडाची राजकारणाला ऊत येईल.

जगात डोंगरा एवढं पाप वाढले आहे. दोऱ्या एवढं पुण्य शिल्लक आहे. कोल्हापूरच्या देवीला स्वप्न पडलंय. तिच्या डोळ्यातून रात्री पाणी येतय.. साताऱ्याच्या गादीवर फुले पडतील. सत्यानं वागा. गर्वाने वागालं तर फसाल. वारा, वावटळ उदंड होतील. काळ्या खडकाच्या लाह्या होतील. विजेने मोठे नुकसान होईल. बाळुमामा यांच्या बकऱ्यांच्या कळपात मेंढीच्या पोटी मुलगा जन्माला येईल. दुनियेत नवल होईल. तरूण पिढी वाममार्गाला लागेल. रेल्वे, मोटारचे मोठे अपघात होतील. नितीमत्ता बाळगा. पाच बोटाने धर्म करा. धर्माची बाजू पुढे न्या.

सोन्याचा भाव तेजीत राहील…..

तीन महिन्यांचे धान्य पिकेल खरीप बहुत होईल. तांबडे रास मध्यंतरी पांढरा धान्य उदंड पिकेल. गावाची पेंडी मध्यम राहील. धान्य दारात वैरण घरात ठेवाल. धान्य महागेल. जगणं मुश्कील होईल, ज्याच्या घरी धान्य तो शहाणा होईल. तांबे, लोखंड मोलाचे होईल. शेतीचा भाव वाढत जाईल. पैशाच्या जोरावर न्याय दिला जाईल. माणूस कागदाचा घोडा नाचवेल. सोन्याचा भाव तेजीतच राहील. पेट्रोल इंधन दरवाढीने जनता हैराण होईल. वैरणीचा भाव वाढत जाईल. वैरण, धान्याच्या चोरी होतील. सांभाळून ठेवा. तांबडी रास मध्यम पिकेल.

नदी जोड प्रकल्प येतील……

मनुष्य जंगलात जाईल, जंगलातील पशूधन गावात येईल. वाड्यावस्त्या ओस पडतील. मेघाची वाट पहाल. पाऊस पाऊस पाणी पाणी म्हणाल. पाण्याचा कप विकत मिळेल. नदीजोड प्रकल्प मोठ्या प्रमाणावर होतील. पाण्यासाठी मोठी आंदोलने होतील. सागरी संपत्तीचा नाश होईल. ऊन्ह्याळाच पावसाळा होईल. धर्माचा पाऊस कर्माचा होईल. मनुष्याला अनेक आजार होईल. डॉक्टर हात टेकतील. मनुष्याला बुद्धी जास्त आयुष्य कमी होईल. विज्ञानाची प्रगती माणसाला घातक ठरेल. विज्ञानाच्या प्रगतीमुळे मनुष्य परावलंबी होईल. आगामी काळात पृथ्वी सोडून मनुष्य पर घरावर राहायला जाईल.

आदमापूर पवित्र पुण्यभूमी……

बाळूमामा शेषनागाचा अवतार हाय. या गावात मी निशाण रोवलंय. माझं ठाण मांडलंय. बाळूमामांचा त्रिभुवनात जयजयकार होईल. आदमापूर बाळुमामांची पवित्र भूमी हायं. पुण्यभूमी हाय. या गावाचा महिमा जगात वाढेल. एकीने वागा. राजकारण आणशीला, करशीला, तर माझ्याशी गाठ हाय. पिवळ्या भस्माचा महिमा अगाध राहील. भगवा झेंडा राज्य करेल. मिरवेल. छत्रपती शिवाजी महाराज पुन्हा जन्माला येतील. आदमापूर वर माझा आशीर्वाद राहील.

आदमापूर (ता. भुदरगड) येथील बाळूमामा भंडारा यात्रा प्रसंगी महाप्रसाद दिनी मंदिरा समोर भाकणूक पार पडली. बाळूमामा देवालयाचे अध्यक्ष धैर्यशील राजे भोसले यांच्यासह हजारो भक्तगण उपस्थित होता.