गोकुळच्या निवडणुकीची औपचारिकता शिल्लक; आमचे डोळे चेअरमन निवडीकडे लागलेत : ग्रामविकास व कामगार मंत्री हसन मुश्रीफ यांचा विश्वास; गडहिंग्लज, आजरा व चंदगड तालुक्यातील प्रमुख कार्यकर्त्यांची नियोजन बैठक
गडहिंग्लज प्रतिनिधी :
गोकुळ निवडणुकीमध्ये सभासदांचा प्रतिसाद व शाहू शेतकरी आघाडीवरील विश्वास पाहता माझी आता खात्री झाली आहे की, प्रचंड मतांनी आघाडीचे पॅनल विजयी होईल. आमचे सर्वच म्हणजे २१ उमेदवार बाजी मारतील. या निवडणुकीमध्ये फक्त औपचारिकता शिल्लक राहिली असून आमचे डोळे आता चेअरमन निवडीकडे आहेत, असा विश्वास ग्रामविकास व कामगार मंत्री हसन मुश्रीफ यांनी व्यक्त केला. चंदगड, गडहिंग्लज, आजरा तालुक्यातील प्रमुख नेतेमंडळींच्या निवडणूक नियोजनाच्या बैठकीत मंत्री श्री. मुश्रीफ बोलत होते.
ते पुढे म्हणाले, गेली २० वर्षे ज्या पद्धतीने सत्ता राबवली गेली. त्याचा प्रचंड राग मतदारांमध्ये पदोपदी जाणवतो. तसेच; गोकुळ दुध संघ मल्टीस्टेट करून घशात घालण्याचे कारस्थान सभासदांनींच हाणून पाडले. याबाबत सभासदांचा प्रचंड प्रतिसाद राजर्षी शाहू शेतकरी आघाडीला आहे.
आमदार राजेश पाटील म्हणाले, गडहिंग्लज, आजरा व चंदगड या तीन्ही तालुक्यांमध्ये राजर्षी शाहू शेतकरी आघाडीची बाजू भक्कम आहे. तीन्हीही तालुक्यांमध्ये मताधिक्य देण्याची शपथ सर्व कार्यकर्त्यांनी घेतली आहे. सर्व नेते व कार्यकर्ते रात्रीचा दिवस करत आहेत. याबद्दल श्री. पाटील यांनी सर्वांप्रती कृतज्ञताही व्यक्त केली.
जिल्हा परिषदेचे उपाध्यक्ष सतीश पाटील म्हणाले, मी स्वतःच उमेदवार आहे, असे समजून काम करत आहे. पक्ष व संघटना यास महत्त्व देणारा व नेत्यांचे आदेश मानणारा मी सच्चा व लढवय्या कार्यकर्ता आहे. मी या निवडणुकीत रक्ताचे पाणी करेन.
यावेळी वसंतराव धुरे, विष्णुपंत केसरकर, सुधिर देसाई -आजरा, रामाप्पा करीगार, अमर चव्हाण, उदय जोशी, जयसिंग चव्हाण, अभय देसाई -अडकूरकर, आभिजीत पाटील, बाबासाहेब पाटील,सोमगोंडा आरभोळे, गंगाधर व्हसकोटे, संतोष पाटील, जयकुमार मुन्नोळी, राकेश पाटील, प्रकाश पताडे, काशिनाथ तेली मारुती घोरपडे आदी प्रमुख उपस्थित होते.
