पालकमंत्री हसन मुश्रीफ यांनी कापशी -मुरगुड मार्गावर हळदवडे गावाजवळ रस्त्यातच गाडीतून उतरून केली माजी खासदार राजू शेट्टी यांची विचारपूस

मुरगुड प्रतिनिधी : विजय मोरबाळे

पालकमंत्री हसन मुश्रीफ यांनी आक्रोश पद यात्रेमध्ये चालणाऱ्या माजी खासदार राजू शेट्टी यांची गाडीतून रस्त्यातच उतरत विचारपूस केली. सेनापती कापशी -मुरगुड मार्गावर कागल तालुक्यातील हळदवडे गावाजवळ ही भेट झाली.

याबाबत अधिक माहिती अशी, सायंकाळी साडेचारच्या सुमाराला मंत्री श्री. मुश्रीफ बेलेवाडी काळम्मा ता. कागल येथील ज्येष्ठ नेते आनंदरावदादा पाटील यांच्या वाढदिवसाचा कार्यक्रम आटोपून मुरगूडकडे येत होते. त्याचवेळी स्वाभिमानी शेतकरी संघटनेचे नेते माजी खासदार राजू शेट्टी यांची आक्रोश पदयात्रा सेनापती कापशीकडून मुरगूडकडे येत होती. मंत्री श्री. मुश्रीफ यांनी रस्त्यातच गाडी थांबवून श्री. शेट्टी यांची भेट घेतली आणि विचारपूस केली. दोन-तीन मिनिटाच्या औपचारिक भेटीनंतर मंत्री श्री. मुश्रीफ गाडीत बसून मुरगूडकडे मार्गस्थ झाले.