कुकुडवाडीत पाणीपुरवठा करणारी विहीर कोसळली
तरसंबळे प्रतिनिधी :
कुकुडवाडी (ता राधानगरी) येथे गावाला पिण्याचे पाणी पुरवठा करणारी विहीर मंगळवार रात्री झालेल्या जोरदार पावसामुळे कोसळली.कोसळलेल्या विहिरीत सत्तर हजार किंमतीचे एक सोलर व एक विद्युत मोटार पंप गाडला गेल्याने एकूण पाच लाखाच्यावर नुकसान झाले आहे.
तारळे खुर्द — कुकुडवाडी (ता राधानगरी) ग्रुप ग्रामपंचायत अंतर्गत येणार्‍या कुकुडवाडी गावातील नागरिकांना पिण्याचे पाणी पुरवठा करण्यासाठी १९८८ ला या विहिरीचे सिमेंट काँक्रीटसह दगडी बांधकाम करण्यात आले होते.पाचशे लोकवस्ती असणार्‍या या गावातील नागरिकांसाठी दोन मोटर पंपाच्या साहाय्याने सकाळ संध्याकाळ पाणीपुरवठा सुरू होता.
दरम्यान मंगळवारी रात्री झालेल्या जोरदार पावसामुळे पूर्ण क्षमतेने पाणी भरलेली विहीर कोसळली.या वेळी पाणी उपसा करण्यासाठी बसविलेले दोन मोटर पंप व लोखंडी बारही या कोसळल्या विहीरीत गाडले गेले. विहिरीला लागूनच शेताकडे जाणारा मुख्य रस्ता आता वहातूकीसाठी धोकादायक बनला आहे. पाणी पुरवठा करणारी विहीर कोसळल्याने ग्रामस्थांना होणारा पाणीपुरवठा आता खंडित होणार आहे परिणामी ऐन पावसाळ्यात पाण्यासाठी नागरिकांना कसरत करावी लागणार आहे.संबंधित विभागाने पर्यायी व्यवस्था करून पाणीपुरवठा सुरळीत करावा अशी मागणी नागरिकांतून होत आहे.
पंचायत समिती पाणी पुरवठा उपअभियंता कराड,शाखा अभियंता लोहार,गवळी, तलाठी संभाजी शिंदे,ग्रामसेवक नंदिनी नाईकनवरे,सरपंच आनंदा पाटील,नाथा पाटील, सदाशिव ढवण, राजु डवरी,वीज वितरणचे सुरेश डवर ,सुरेश पाटील आदीसह बी.जी.डवरी,दिलीप विटेकर,तानाजी मगदुम बळवंत पाटील ,बाबुराव विटेकर,दत्तात्रय पौडंकर यांच्या उपस्थितीत पंचनामा करण्यात आला.
