भारतरत्न डॉ. बाबासाहेब आंबेडकर यांची जयंती साधेपणाने साजरी करावी : जिल्हाधिकारी दौलत देसाई

कोल्हापूर, : रोहन भिऊंगडे

भारतरत्न डॉ. बाबासाहेब आंबेडकर जयंती 14 एप्रिल रोजी साजरी केली जाणार आहे. सध्या कोव्हिड-19 च्या दुसऱ्या लाटेमुळे उद्भवलेल्या अतिसंसर्गजन्य परिस्थितीचा विचार करता व वाढत्या कोरोना रुग्णांच्या संख्येचा विचार करता यावर्षी परमपुज्य भारतरत्न डॉ. बाबासाहेब आंबेडकर यांची जयंती साधेपणाने साजरी करावी, अशी सूचना जिल्हाधिकारी दौलत देसाई यांनी दिली आहे.
महानगरपालिका आयुक्त, जिल्हा परिषदेचे मुख्य कार्यकारी अधिकारी, पोलीस अधीक्षक, उपविभागीय अधिकारी तथा उपविभागीय दंडाधिकारी (सर्व), तहसिलदार तथा कार्यकारी दंडाधिकारी (सर्व), मुख्याधिकारी (सर्व) नगरपालिका/ नगरपरिषद/ नगरपंचायत, गटविकास अधिकारी (सर्व) यांना पाठविलेल्या पत्रात म्हटले आहे की, दरवर्षी 14 एप्रिल या दिवशी परमपूज्य भारतरत्न डॉ. बाबाबसाहेब आंबेडकरांचे अनेक अनुयायी मोठ्या संख्येने जमून तसेच जयंती दिनाच्या आदल्या दिवशी मध्यरात्री 12 वाजता देखील एकत्र येऊन परमपूज्य भारतरत्न डॉ. बाबासाहेब आंबेडकर जयंती राज्यात ठिकठिकाणी साजरी करतात. यावर्षी कोव्हिड-19 चा वाढता प्रादुर्भाव टाळण्यासाठी अत्यंत साधेपणाने सकाळी 7 वाजेपासून संध्याकाळी 8 वाजण्यापूर्वी भारतरत्न डॉ. बाबासाहेब आंबेडकर जयंती साजरी करावी.
यावर्षी कोव्हिड-19 विषाणूचा वाढता प्रादुर्भाव विचारात घेता दर वर्षीप्रमाणे प्रभात फेरी, बाईक रॅली, मिरवणुका यावेळी जयंती निमित्त काढण्यात येऊ नयेत. त्याऐवजी परमपूज्य भारतरत्न डॉ. बाबासाहेब आंबेडकर यांच्या पुतळ्याला अथवा प्रतिमेला पुष्पहार अर्पण करताना त्या ठिकाणी अनुयायांची संख्या एकावेळी 5 पेक्षा जास्त नसावी तसेच तेथे सोशल डिस्टंन्सींगचे व स्वच्छतेच्या सर्व नियमांचे काटेकोरपणे (मास्क, सॅनिटायझर इत्यादी) पालन करुन परमपुज्य भारतरत्न डॉ. बाबासाहेब आंबेडकर जयंती साजरी करण्यात यावी.
दरवर्षी परमपूज्य भारतरत्न डॉ. बाबासाहेब आंबेडकर जयंती साजरी करताना संपूर्ण महाराष्ट्रात विविध कार्यक्रमांचे आयोजन केले जाते. परंतु यावर्षी कोव्हिड-19 विषाणुचा वाढता प्रादुर्भाव पाहता सार्वजनिक ठिकाणी गाणी, व्याख्याने, पथनाट्य इत्यादीचे सादरीकरण अथवा इतर कोणत्याही सांस्कृतिक कार्यक्रमांचे आयोजन जयंती निमित्ताने करण्यात येऊ नये. त्याऐवजी सदर कार्यक्रमाचे केबल नेटवर्कद्वारे अथवा ऑनलाईन प्रक्षेपण उपलब्ध करुन देण्याबाबत व्यवस्था करण्यात यावी.
परमपूज्य भारतरत्न डॉ. बाबासाहेब आंबेडकर जयंती दिनी आरोग्य विषयक उपक्रम/ शिबिरे (उदा. रक्तदान) स्थानिक प्रशासनाच्या पुर्वानुमतीने आयोजित करता येतील आणि त्याद्वारे कोरोना, मलेरिया, डेंग्यू इत्यादी आजार आणि त्यांचे प्रतिबंधात्मक उपाय तसेच स्वच्छता याबाबत जनजागृती करता येईल, तथापि आरोग्य विषयक उपक्रमांचे आयोजन करताना त्या ठिकाणी सोशल डिस्टंन्सींग तसेच स्वच्छतेचे नियम (मास्क, सॅनिटायझर इत्यादी) पाळण्याकडे विशेष लक्ष देण्यात यावे.
राज्यातील कोव्हिड-19 विषाणुचा प्रादुर्भाव रोखण्यासाठी शासनाच्या मदत व पुनर्वसन, आरोग्य, पर्यावरण, वैद्यकीय शिक्षण विभाग तसेच संबंधित महानगरपालिका, पोलीस प्रशासन, स्थानिक प्रशासन यांनी विहित केलेल्या नियमांचे काटेकोर पालन करावे. प्रत्यक्ष जयंती दिनाच्या कार्यक्रम सुरु होण्याच्या मधल्या कालावधीत शासनस्तरावरुन आणखी काही मार्गदर्शक सूचना प्रसिध्द झाल्यास त्यांचे देखील अनुपालन करावे.
‘परमपूज्य भारतरत्न डॉ. बाबासाहेब आंबेडकर’ जयंती 2021 साजरी करतेवेळी उपरोक्त नमुद सर्व मार्गदर्शक सूचनांचे काटेकोरपणे पालन करण्याबाबत आपले अधिनस्त सर्व संबंधितांना आपल्या स्तरावरुन सूचना देण्यात याव्यात.