सौंदर्यवती पोलीस उपनिरीक्षक पल्लवी जाधव अडकल्या विवाहबंधनात; जाणून घ्या त्यांचा प्रेरणादायी प्रवास

महिलांना अनेकदा कमी लेखलं जातं, एखादी महिला दिसायला सुंदर नसेल, छान कपडे घालत नसेल किंवा मेक-अप करत नसेल तर ‘बहनजी’ म्हणून हिणवलं जातं तर एखादी महिला आपल्या दिसण्याकडे विशेष लक्ष देत असेल तर ‘हिला काय काम जमणार, नुस्ती बाहुली आहे,’ म्हणत अपमान केला जातो.

अशावेळेस एक पोलीस अधिकारी आणि मॉडेल, सौंदर्यवती या दोन भूमिका कशा निभवल्या याबद्दल बोलताना पल्लवी सांगतात की, “पोलीस अधिकारी असणं माझं कर्तव्य आहे, जिद्द आहे तर मॉडेल बनणं हा छंद. पोलिसांचे नियमही हेच सांगतात की पोलीस दलातले लोक आपले छंद जोपासू शकतात. त्यामुळे मला डिपार्टमेंटमधून कधी विरोध झाला नाही, उलट कौतुकच झालं. आणि समाजाचं म्हणाल तर आख्या महाराष्ट्राला माहिती आहे की पल्लवी जाधव पोलीस अधिकारी म्हणून कशी आहे, कशी राहते, कसं काम करते. लोकांना माझ्या कामाचंच कौतुक आहे. सोशल मीडियावरही माझ्या वर्दीतल्या फोटोंना जास्त लाईक्स मिळतात.”

ड्युटीच्या काळात ड्युटीच असं त्या सांगतात. “मी खाकीवर्दीत रफ अँड टफ असते आणि रँपवर सौंदर्यवती असते.”

जे लोक महिलांची फक्त त्यांच्या दिसण्यावरून पारख करतात त्यांनाही पल्लवी आपल्या स्टाईलमध्ये उत्तर देताना म्हणतात की, “कोणतीही महिला तुमची बांधील नाही. तिला स्वतःचे हक्क आहेत, अधिकार आहेत आणि मतं आहेत. त्या महिलेला तुम्ही खाली ओढण्याचा प्रयत्न करू नका. आणि महिलांनाही माझं हेच सांगणं आहे की तुम्ही स्वतःला कधी कमी समजू नका.”

या मुलाखतीवेळी त्यांना बीबीसी मराठीने त्यांना विचारले होते तुमचा पुढचा प्लान काय आहे. तेव्हा त्यांनी हसत उत्तर दिले होते की लग्न करायचं आहे आणि योग्य व्यक्तीचा शोध चालू आहे.

त्यावेळी त्या म्हणाल्या होत्या, “आतापर्यंत मी थोडी चालढकल करत होते, कारण कोणाची मिसेस होण्याच्या आधी मला ‘मिस इंडिया’ व्हायचं होतं.”