सदाशिवराव मंडलिक महाविद्यालयात स्वातंत्र्यसैनिकांच्या वारसांचा सत्कार व स्नेहमेळावा पडला पार !
मुरगुड प्रतिनिधी :
बुधवार दि. ८ जून रोजी मुरगुड व मुरगुड परिसरातील स्वातंत्र्यसैनिकांच्या वारसांचा सत्कार व स्नेहमेळावा आयोजित करण्यात आला. ‘आजादी का अमृतमहोत्सव’ या कार्यक्रमांतर्गत राज्यशास्त्र विभाग व राष्ट्रीय सेवा योजना यांच्या संयुक्त विद्यमाने हा कार्यक्रम आयोजित केला होता. कार्यक्रमाच्या अध्यक्षपदावरून बोलताना प्राचार्य डॉ. अर्जुन कुंभार म्हणाले की ,आजच्या युवकांनी स्वातंत्र्यवीरांचा प्रेरणादायी इतिहास जाणून घेतला पाहिजे. ब्रिटीश सरकारच्या विरोधात सर्वांना एकत्र करून त्यांच्यात देशप्रेम निर्माण करण्याचे महान कार्य या परिसरातील स्वातंत्र्यसैनिकांनी केले. उपप्राचार्य व राज्यशास्त्र विभाग प्रमुख डॉ. टी. एम. पाटील यांनी स्वातंत्र्यसैनिकांची यशोगाथा व ब्रिटीश सरकारच्या विरोधातील लढ्याबद्दल सविस्तर माहिती विद्यार्थ्यांना करून दिली. स्वातंत्र्यसैनिकांचा आदर्श डोळ्यासमोर ठेवून विद्यार्थ्यांनी वाटचाल केल्यास निश्चितच ध्येय प्राप्ती होऊ शकते,असा आशावाद त्यांनी व्यक्त केला.
यावेळी समाजवादी प्रबोधिनीचे मुरगूड शाखेचे प्रमुख प्रा. डी. डी. चौगुले यांनी स्वातंत्र्यसैनिकांच्या जीवनाचा खडतर प्रवास व त्यांच्याबद्दलचे यथोचित प्रसंग विशद केले आणि विद्यार्थ्यांना राष्ट्रभावना जागृत ठेवण्याचे आवाहन केले. यावेळी त्यांनी हुतात्मा तुकाराम भारमल, ईश्वरराव गोधडे , हरिभाऊ जोशी आदी स्वातंत्र्यसैनिकांच्या स्वातंत्र्याबद्दलच्या योगदानाची सविस्तर माहिती दिली. सदर कार्यक्रमात श्रीकांत भोसले, विनय पोतदार, ओंकार पोतदार, शिवप्रसाद बोरगावे आदींनी आपले मनोगत व्यक्त केले. सदर कार्यक्रमास बावीस स्वातंत्र्यवीरांचे वारसदार सहभागी होते. कार्यक्रमाचे स्वागत प्रा. सुशांत पाटील यांनी केले. कार्यक्रम यशस्वी करण्यासाठी राष्ट्रीय सेवा योजनेचे प्रकल्प अधिकारी डॉ. ए. डी. जोशी, प्रा. डी. व्ही. गोरे , प्रा. स्वप्नील मेंडके , प्रा. संजय हेरवाडे यांनी परिश्रम घेतले…आभार प्रा. डॉ. एम. ए. कोळी यांनी मानले. सदर कार्यक्रमास बहुसंख्येने विद्यार्थी-विद्यार्थिनी उपस्थित होते.
