“शहरातील फुटके कंटेनर बदला” आरोग्य विषयक समस्यांवर ‘आप’चे आरोग्यधिकाऱ्यांना निवेदन

कोल्हापूर प्रतिनिधी : रोहन भिऊंगडे

शहरातील कचरा उठावाचा बोजवारा उडाला आहे. महापालिका क्षेत्रात मोजक्या कंटेनरच्या माध्यमातून कचरा उठाव सुरू आहे. त्यामधील अधिकतर कंटेनर फुटलेले आहेत. त्यामुळे शहरभर दुर्गंधी पसरली आहे. तसेच डेंगू, चिंगनगुनिया सारखे आजार फोफावत आहेत. भटक्या कुत्र्यांच्या वावरणे लहान मुलांना धोका उद्भवत आहे. यासारख्या आरोग्य विषयक समस्यांवर उपाययोजना करण्यासाठी आम आदमी पार्टीने प्रभारी आरोग्यधिकारी डॉ. प्रकाश पावरा यांना निवेदन दिले.

निवेदनात म्हटले आहे,

वेळेत कचरा उठाव होण्यासाठी टिपरचे नियोजन करावे. या प्रभागांमध्ये फुटक्या कंटेनरच्या जागी सुस्थितीत असलेले कंटेनर बसवावेत. काही मोठ्या खाजगी दवाखान्यांच्या बाहेर (जसे एस्टर आधार हॉस्पिटल) असलेल्या कंटेनर मधून कचरा उलटून वाहत असतो. परिसरातील नागरिकांचे आरोग्य यामुळे धोक्यात येत आहे. कोरोनाच्या परिस्थितीत अशा दवाखान्यांमधील कचरा उठाव वेळेत होणे गरजेचे आहे.

टिपर द्वारे कचरा उठाव करताना डम्पिंग साईट लांब असल्याने एका गाडीला दिवसभरात फक्त 3 फेऱ्या मारता येतात. यामुळे वेळ आणि इंधन मोठ्या प्रमाणात वाया जाते. वेळ आणि इंधनाची बचत करून टिपरच्या फेऱ्यांची संख्या वाढण्यासाठी ‘ट्रान्सफर स्टेशन’ द्वारे घनकचरा व्यवस्थापन करण्याचा प्रस्ताव आपल्या विभागाने तयार करावा. या ट्रान्सफर स्टेशनच्या माध्यमातून शहरात विकेंद्रित पद्धतीने कचऱ्याचे नियोजन करता येईल.

कसबा बावडा येथील घनकचरा प्रकल्पावर बायोमाइनिंगचे काम थांबले आहे. त्यामुळे तिथे असणाऱ्या कचऱ्याची विल्हेवाट लावण्यासाठी नवीन यंत्रणा कार्यान्वित करणे गरजेचे आहे. यावर आपल्याकडून प्रस्ताव सादर करून कार्यवाही व्हावी.
शहरात डेंगू, चिकनगुनिया यासारख्या रोगांचा प्रादुर्भाव वाढत आहे. या रोगांचा प्रादुर्भाव रोखण्यासाठी आरोग्य विभागाने विशेष सर्व्हे व जनजागृती मोहीम राबवावी. प्रत्येक प्रभागात आठवड्यातून दोनदा फवारणी करण्यात यावी.
शहरात भटक्या कुत्र्यांचा वावर मोठ्या प्रमाणात आहे. त्यांच्यामुळे अनेकदा लहान मुलांचा चावा घेणे, रात्रीच्या वेळेस नागरिकांच्या अंगावर धावून येणे, गाडीच्या आडवे आल्याने अपघात होणे यासारख्या घटना घडत आहेत. यावर उपाययोजना म्हणून कुत्र्यांच्या लसीकरण व निर्बिजीकरण करण्यासाठी विशेष मोहीम राबिवण्यात यावी.

यावेळी पश्चिम महाराष्ट्र अध्यक्ष संदीप देसाई, उत्तम पाटील, सूरज सुर्वे, मोईन मोकाशी, गिरीश पाटील, विशाल वठारे, राज कोरगावकर, रविराज पाटील, विजय भोसले आदी उपस्थित होते.