कोल्हापूर : संभाजीनगर येथे भरदिवसा गणपतीच्या अंगावरील चांदीचा हार केला लंपास
कोल्हापुरातील संभाजीनगर इथल्या आयडियल स्पोर्ट्स क्लब तरुण मंडळाच्या गणपतीच्या अंगावरील दागिन्यांवर चोरट्याने दिवसाढवळ्या डल्ला मारल्याची घटना समोर आली आहे.
चोरट्याने गणेश मूर्तीला परिधान केले अंगावरील तब्बल अर्धा किलो वजनाचा चांदीचे दागिने लंपास केले असून आज सकाळच्या सुमारास ही घटना घडली. त्यानंतर जुना राजवाडा पोलिसांनी घटनास्थळी दाखल होत चोरट्याचा शोध सुरू केला आहे.
गणपतीवर किलोभर सोने चांदीचे दागिने घालण्यात येत असतात. तर हे दागिने रात्रंदिवस मूर्तीवर असतात आणि याचाच संधी साधत चोरट्याने या दागिन्यांवर डल्ला मारायच्या घटना समोर येत आहेत. कोल्हापुरातील संभाजीनगर येथील आयडियल स्पोर्ट्स क्लब तरुण मंडळाच्या गणपती बाप्पाच्या मूर्तीवरील अर्धा किलो चांदीचा हार चोरट्यांनी लंपास केल्याची घटना समोर आली आहे.
रात्री मंडळातील कार्यकर्ते मंडपातच झोपले होते. सकाळ झाल्यानंतर कार्यकर्ते आंघोळीसाठी घरी गेले यावेळी चोरट्याने संधी साधत दिवसाढवळ्या गणेश मूर्तीवरील अर्धा किलो चांदीचा हार लंपास केला. कार्यकर्ते आंघोळ करून मंडपात आल्यानंतर हा प्रकार त्यांच्या निदर्शनास आला आणि त्यांनी त्वरित जुना राजवाडा पोलीस यांना संपर्क करत घडलेल्या घटनेची माहिती दिली. पोलिसांनी घटनास्थळी येऊन पंचनामा करत परिसरातील सीसीटीव्ही कॅमेराच्या आधारे चोरट्याचा शोध पोलिसांनी सुरू केला आहे.
