मुरगुड येथील सरपिराजीराव तलाव ९७ वर्षात ९२ वेळा ओसंडला

मुरगूड प्रतिनिधी : विजय मोरबाळे

मुरगुड ता कागल येथील शतकाकडे ( ९७ वर्षे ) वाटचाल करणारा ऐतिहासिक सरपिराजीराव तलाव ३७ फूट ३ इंच फूट इतक्या पूर्ण क्षमतेने भरून ४०० फूट लांबीच्या सांडव्यावरून आज ( दि-१९ जूलै ) ओसंडून वाहात आहे .९७ वर्षात ९२ वेळा ओसंडून वाहण्याची ऐतिहासिक कामगिरी तलाव निभावत आहे . त्यामुळे मुरगूड,शिंदेवाडी, यमगे गावांना पिण्याच्या पाणीपुरवठ्याचा व २२५ एकर शेतीच्या पाण्याचा प्रश्र मार्गी लागला आहे .
सरपिराजीराव तलावात जुन ते १९ जूलै अखेर ९६८ मिमी इतका दमदार पाऊस पडला आहे . गाढव वाहन असलेल मृग नक्षत्र जोरदार बरसले . त्यामुळे पाणीसाठा ३३ फूट इतके झाले होते . तर कोल्ह्याचे वाहन असलेल्या आर्द्रा बरसल्याच नाहीत . तसेच उंदीर वाहन असलेला पुनर्वसू ( तरणा )नक्षत्र आठवडाभर कोरडेच गेलं . मात्र चार दिवस दमदार पाऊस बरसल्याने ओसंडण्यासाठी खोळंबलेला तलाव आज ४०० मी . सांडव्यावरून ओसंडून आज दि-१९ जूलै रोजी वाहु लागला आहे .गतवर्षी दि-२० जुलै रोजी तलाव ओसंडला होता .त्यामुळे मुरगूड, शिंदेवाडी व यमगे गावांना पिण्याचा पाणीपुरवठा करण्याचा व २२५ एकर शेतीला पाणीपुरवठा करण्याची जबाबदारी सर पिराजीराव तलाव चोखपणे वठवीत आहे .
येथील सरपिराजीराव तलाव हा ऐतिहासिक आहे .१९२३ ते २०१९ या कालावधीत ९७ वर्षात ९२ वेळा पूर्ण क्षमतेने भरून ओसंडून वाहिला आहे .३७ फूट ३ इंच उंचीच्या,तीन चौरस मैल परीघ असलेल्या अन १२० एकरात दहा कोटी २२ लाख १९ हजार ९८० घनफूट इतका पाणी संचय होतो . या तलावातून २२५ एकर शेतीसह मुरगूड, शिंदेवाडी ,यमगे या गावांना पिण्यासाठी पाणी पुरवठा होतो .
शंभरीकडे वाटचाल करणारा ऐतिहासिक सरपिराजीराव तलाव ९७ वर्षात ९२ वेळा पूर्ण क्षमतेने ( ३७ , ३ फूट ) ओसंडून वाहिला आहे .१९७२ साली३२ फूट,१९८७ ला ३६,९ फूट, २००१ साली ३२,३ फूट, २००३ ला ३३,६ फूट तर २०१५ ला केवळ २५,९ फूट या पाच वर्षात तलाव पूर्ण क्षमतेने भरलेला नाही .२०१५ साली केवळ २५ , ९ फूट इतका पाणीसाठा असल्याने मुरगूड, शिंदेवाडी व यमगे या गावांना तीव्र पाणीटंचाईस तोंड दयावे लागले होते . या वर्षीही सरपिराजीराव तलाव पूर्ण क्षमतेने भरला असल्याने तीन गावच्या पिण्याच्या पाण्याचा व २२५ एकर शेतीचा प्रश्र मार्गी लागणार आहे .