देशातल्या इतर राज्यातील विद्यार्थी वैद्यकीय शिक्षण घेण्यासाठी राज्यात आकर्षित होतील अशी सुस्थिती निर्माण करावी : हसन मुश्रीफ

प्रतिनिधी :विजय मोरबाळे

राज्यातील वैद्यकीय महाविद्यालये इतर राज्यांतील वैद्यकीय महाविद्यालयापेक्षा चांगली आहेत. महाविद्यालयांच्या इमारती आहेत त्यापेक्षा अधिक सुंदर, सुसज्ज करून दर्जेदार व गुणवत्तापुर्ण शिक्षण मिळेल अशी व्यवस्था करून देशातल्या इतर राज्यातील अधिकाधिक विद्यार्थी वैद्यकीय शिक्षण घेण्यासाठी राज्यात आकर्षित होतील अशी सुस्थिती निर्माण करावी, असे वैद्यकीय शिक्षण व औषधी द्रव्य मंत्री हसन मुश्रीफ यांनी सांगितले.

मुंबईमध्ये यशवंतराव चव्हाण प्रतिष्ठान येथे राज्यातील सर्व शासकीय वैद्यकीय, आयुष्य आणि दंत महाविद्यालयातील अधिष्ठाता यांच्याकडून रुग्णालय आणि महाविद्यालयांचा आढावा घेतांना ते बोलत होते. यावेळी वैद्यकीय शिक्षण विभागाच्या सचिव डॉ. अश्विनी जोशी, वैद्यकीय शिक्षण व आयुष्यचे आयुक्त राजीव निवतकर, वैद्यकीय शिक्षण व संशोधन संचालक डॉ. अजय चंदनवाले, आयुष्य संचालनालयाचे संचालक डॉ. वैद्य रामन घुंगळेकर, वैद्यकीय शिक्षण व संशोधन सहसंचालक डॉ. विवेक पाखमोडे यांच्यासह राज्यातील शासकीय वैद्यकीय महाविद्यालयांचे अधिष्ठाता उपस्थित होते.

मंत्री श्री. मुश्रीफ म्हणाले, राज्यातील गरीब व गरजूंना उच्च दर्जाच्या आरोग्यसेवा पुरविण्यासाठी शासकीय महाविद्यालये व रुग्णालयात औषध आणि साहित्यासाठी निधी कमी पडू देणार नाही. शासकीय वैद्यकीय महाविद्यालयात गुणवत्तेनुसार साधारण परिस्थिती असणारे विद्यार्थी प्रवेश घेतात. त्यांना चांगल्याप्रकारच्या सुविधा उपलब्ध करून द्याव्यात.

शासकीय वैद्यकीय महाविद्यालयात प्राध्यापक रुजू व्हावे, यासाठी त्यांना देण्यात येणाऱ्या सुविधांमध्ये वाढ करण्यात यावे. वैद्यकीय महाविद्यालय व रुग्णालयातील अडीअडचणी व नवीन सुधारणांचे प्रस्ताव तातडीने शासनास पाठवावे. राज्यातील वर्ग ३ व ४ कर्मचारी पदभरती अंतिम टप्प्यात असून एक महिनाभरात रुजू होतील. १०० टक्के रिक्त पदे भरण्यात आली आहेत. त्यामुळे; आरोग्यसेवा सुरळीत होणार आहे. महाविद्यालये आणि रुग्णालये स्वच्छ व सुंदर ठेवण्याच्या मंत्री श्री. मुश्रीफ यांनी अधिष्ठातांना सूचना केल्या.

सर्व अधिष्ठातांनी चांगले काम करावे , सेवा सुधारण्यासाठी प्रयत्न करावे, इमारतींसह वाढीव सुविधा पुर्ण करण्यासाठी शासन नेहमी आपल्याबरोबर असेल, असेही मंत्री श्री. मुश्रीफ यांनी सांगितले.

सचिव डॉ. जोशी यांनी सर्व अधिष्ठातांकडून सविस्तर आढावा घेवून सूचना केल्या. प्रास्ताविक आयुक्त डाॅ. निवतकर यांनी केले तर डॉ. अजय चंदनवाले यांनी आभार मानले.