चांगल्या यशातून विद्यार्थ्यांनी शाहू ग्रुपचे नाव उज्वल करावे : श्रीमती सुहासिनीदेवी घाटगे ; कर्मचारी पतसंस्थेमार्फत गुणवंत विद्यार्थ्यांचा सत्कार

कागल प्रतिनिधी : विजय मोरबाळे

शाहू साखर कारखान्याचे संस्थापक स्व. राजे विक्रमसिंहजी घाटगे यांनी शाहू ग्रुपमधील सभासदांसह मुलांच्या शैक्षणिक व सर्वांगीण विकासास नेहमीच प्रोत्साहन दिले.त्यांच्या पश्चात शाहू ग्रुपचे अध्यक्ष राजे समरजितसिंह घाटगे यांनी ही परंपरा अखंडितपणे सुरू ठेवली आहे.त्यामुळे विद्यार्थ्यांना प्रोत्साहन मिळत आहे.श्री छत्रपती शाहू सहकारी साखर कारखान्याच्या कर्मचाऱ्यांच्या मुलांनी चांगले शिक्षण घ्यावे. चांगले यश मिळवून त्यांनी आई-वडील, कारखाना,पतसंस्था व शाहू ग्रुपचे नाव उज्वल करावे, असे प्रतिपादन श्री. छत्रपती शाहू सहकारी साखर कारखान्याच्या अध्यक्षा श्रीमती सुहासिनीदेवी घाटगे यांनी केले.

श्री.छत्रपती शाहू सहकारी साखर कारखाना सेवकांच्या पतसंस्थेमार्फत कर्मचाऱ्यांच्या दहावी व बारावीतील गुणवंत विद्यार्थ्यांच्या सत्कार व बक्षीस वितरण प्रसंगी त्या बोलत होत्या.

पतसंस्थेचे चेअरमन, कार्यकारी संचालक जितेंद्र चव्हाण,व्हाईस चेअरमन बाळासाहेब बिरंजे,सर्व संचालक,कारखान्याचे अधिकारी, कर्मचारी व पालक यांची यावेळी प्रमुख उपस्थिती होती.

पतसंस्थेचे चेअरमन व कार्यकारी संचालक जितेंद्र चव्हाण म्हणाले,” शाहू ग्रुपचे संस्थापक स्व.राजे विक्रमसिंह घाटगे यांच्या मार्गदर्शनाखाली एकवीस वर्षांपूर्वी कर्मचारी सभासदांच्या मुलांना प्रोत्साहन मिळावे. या उद्देशाने सभासद कल्याण निधीतून ही शैक्षणिक योजना सुरू केली आहे.

यावेळी दहावीमधील दिव्या गुरव,श्रावणी पाटील,श्रेया पडळे व बारावीमधील सानिका घाटगे,तकशीला निकम, कीर्ती खोत व हर्षद पवार यांचा श्रीमती घाटगे यांनी सत्कार केला.

स्वागत सचिव धोंडीराम पाटील यांनी यांनी केले. विजयकुमार चौगुले यांनी आभार मानले.