नविन शैक्षणिक धोरण आव्हान न समजता नव्या आव्हानावर स्वार होऊन नव्या युगाचा नवा शिक्षक बना : गटाशिक्षणाधिकारी डॉ. गणपती कमळकर
मुरगूड प्रतिनिधी : विजय मोरबाळे
नव्या शैक्षणिक धोरणामध्ये शिक्षकांकडून विद्यार्थ्यांना अतिरिक्त एक भाषा शिकवावी लागणार आहे. नविन शैक्षणिक धोरण आव्हान न समजता नव्या आव्हानावर स्वार होऊन नव्या युगाचा नवा शिक्षक बना असे आवाहन गटाशिक्षणाधिकारी डॉ. गणपती कमळकर यांनी केले.
स्वागत व प्रास्ताविक विषयतज्ञ शहाजी पाटील यांनी केले. अनिल हासबे यांनी आभार मानले. महाराष्ट्र शासनाच्या शालेय शिक्षण व क्रीडा विभागामार्फत राज्य शैक्षणिक संशोधन व प्रशिक्षण परिषद अंतर्गत डायट कोल्हापूर आणि पंचायत समिती कागल शिक्षण विभाग आयोजित माध्यमिक व उच्च माध्यमिक शिक्षक क्षमता वृद्धी प्रशिक्षण तालुकास्तरीय शिक्षक प्रशिक्षण शिबीराच्या उद्घाटनप्रसंगी बोलत होते. ९वी ते १२ वी इयत्तेस अध्यापन करणारे शिक्षक- शिक्षिका या प्रशिक्षण शिबिरास उपस्थित होते.हे शिबीर मुरगुड विद्यालय जूनियर कॉलेज येथे सुरु आहे.
या प्रशिक्षण शिबिरामध्ये तज्ञ मार्गदर्शक म्हणून अनिल हासबे यांनी कृती संशोधन आणि नवोपराक्रम, धनाजी सातपुते यांनी 21 व्या शतकातील कौशल्य व भविष्य वेधी शिक्षण, महेश माने यांनी अंतर समवाय क्षेत्रे, रामचंद्र म्हातुगडे यांनी शाळा आधारित व क्षमता आधारित मूल्यांकन या विषयावर मार्गदर्शन केले.
