”आरोप सिद्ध झाले तर राजकारण सोडेन” ; संजय राऊत यांचे प्रतिआव्हान
मुंबई प्रतिनिधी :
ईडीनं शिवसेना खासदार संजय राऊतांशी संबंधित अलिबागमधील 8 जमिनीचे प्लॉट आणि मुंबईतील फ्लॅट जप्त केले आहेत. ईडीकडून ही जप्तीची कारवाई करण्यात आली आहे. यावर संजय राऊत यांनी प्रतिक्रिया दिली आहे. ईडीच्या कारवाईला सामोरं जाण्यासाठी आम्ही खंबीर आहोत, असं संजय राऊत यांनी म्हटलं आहे.
एबीपी माझानं यासंदर्भातलं वृत्त दिलं आहे. आरोप सिद्ध झाले तर राजकारण सोडेन, असं प्रतिआव्हान संजय राऊत यांनी दिलं आहे. तसंच ईडीनं जप्त केलेल्या फ्लॅटमध्ये माझं कुटुंब राहत असल्याचंही राऊतांनी म्हटलं आहे.
राजकीय सूडापोटी कारवाई केली असल्याचंही ते म्हणालेत. इतकंच काय तर माझं घर जप्त केल्यानं भाजपला आनंद झाला आहे, असा टोलाही राऊतांनी भाजपला लगावला आहे. आमच्या कष्टातून आम्ही घर घेतलं असल्याचंही राऊत सांगायला विसरले नाहीत. 1 रु. जरी अवैध प्रॉपर्टी असेल तर भाजपला दान करेन असं संजय राऊतांनी म्हटलं आहे.
सूडाच्या कारवायांना मी घाबरत नाही असं म्हणत हा सूड मराठी माणसावर घेतला जात आहे, इतकं खालचं राजकारण कधी महाराष्ट्राने पाहिलं नव्हतं, असं राऊत म्हणालेत. माझ्यावर 55 लाखांचं कर्ज होतं याची माहिती मी शपथपत्रात दिली होती. ईडीच्या कारवायांना सामोरं जाण्यासाठी आम्ही खंबीर आहोत, असं स्पष्ट त्यांनी म्हटलं आहे.
संजय राऊत यांनी सोशल मीडियावर ट्विट करुन आपली पहिली प्रतिक्रिया दिली आहे. ट्विट करत संजय राऊत म्हणाले की, असत्यमेव जयते!! संजय राऊतांनी मनी लाँड्रिंगमधील पैशातून संपत्ती खरेदी केली असल्याची माहिती ईडीकडून देण्यात आली आहे. तसंच संजय राऊत आणि त्यांच्या जवळील नेत्यांवरही कारवाई करण्यात आल्याची माहितीही समोर येतेय.
काय आहे प्रकरण ?
गोरेगावमध्ये गुरुआशिष कंपनीला चाळीच्या पुनर्विकासाचं काम देण्यात आलं होतं. मात्र प्रवीण राऊत यांनी म्हाडाच्या अधिकाऱ्यांच्या साथीनं या जागेतील एफएसआय परस्पर विकल्याचं प्रथमदर्शनी समोर आलं आहे. गोरेगाव पश्चिमेतील सिद्धार्थ नगर भागातील या झोपडपट्टीचं काम न करताच परस्पर काही वर्षांपूर्वी इथला एफएसआय बेकायदेशीररित्या विकण्यात आला. हा व्यवहार तब्बल 1000 कोटी रुपयांचा होता. एचडीआयएलच्या प्रमोटर्सना पैशांची अफरातफर करण्यात मदत केली, असा आरोपही प्रवीण राऊत यांच्यावर ठेवण्यात आला आहे.
