श्री. क्षेत्र आडी येथे डॉ. डी वाय पाटील यांची सदिच्छा भेट

कोगनोळी :

आडी (ता.निपाणी) येथील संजीवन गिरी वरील दत्त देवस्थान मठाला त्रिपुरा व बिहार राज्याचे माजी राज्यपाल पद्मश्री डॉ.डी. वाय. पाटील यांनी शनिवारी सदिच्छा भेट दिली. परमपूज्य परमात्मराज महाराज यांनी त्यांचे स्वागत केले. व शाल, श्रीफळ देऊन त्यांचा यथोचित सत्कार करण्यात आला. शिक्षण क्षेत्रातील अग्रणी व्यक्तिमत्त्व, त्रिपुरा व बिहारचे माजी राज्यपाल असलेले पद्मश्री डाॅ. डी. वाय्. पाटील यांनी आडी येथील श्री दत्त देवस्थान येथे येऊन परमपूज्य परमात्मराज महाराज यांची भेट घेतली. यावेळी दोघांमध्ये दीडतास चर्चा झाली. त्यांनी महाराजांना स्वतःच्या दिनचर्येविषयी सांगितले. 86 वर्षे वयातही डाॅ. डी. वाय्. पाटील मंत्र जप व ग्रंथवाचन करीत असतात. त्यांनी आतापर्यंत प.पू. परमात्मराज महाराजांचे अनेक ग्रंथ वाचले आहेत. त्यांना यावेळी महाराजांनी रस्याव हा नूतन ग्रंथ भेट म्हणून दिला. या ग्रंथाचेही अवश्य वाचन करणार असल्याचे डाॅ. डी. वाय्. पाटील म्हणाले. वार्धक्यातही ग्रंथवाचन करीत राहत असल्याबद्दल प.पू. परमात्मराज महाराजांनी त्यांचे कौतुक केले. ‌ डाॅ. डी. वाय्. पाटील यांच्या नांवावर आज अनेक विद्यापीठे, स्पोर्टस् अकॅडमी आहेत. शिक्षण क्षेत्रात व इतरही क्षेत्रांमध्ये फार मोठे काम असूनही आध्यात्मिक क्षेत्राविषयी त्यांच्या मनात अत्यन्त आवड आहे, हे विशेष आहे. आडी येथील श्रीदत्तक्षेत्राविषयी त्यांना प्रचण्ड आत्मीयता आहे. ते या स्थानी सातत्याने येऊन प.पू. परमात्मराज महाराजांची भेट घेत असतात. यावेळी आश्रमातील साधू साधक उपस्थित होते.