बोरवडेत वृद्धेच्या तोंडात बोळा कोंबून दागिने लांबवले ; दिवसाढवळ्या घडलेल्या घटनेने खळबळ
बिद्री प्रतिनीधी (अक्षय घोडके) :
बोरवडे ता. कागल येथे रस्त्याने चालत निघालेल्या वृद्ध महिलेच्या तोंडात अज्ञात व्यक्तीने कापडाचा बोळा कोंबून तिच्याकडील अंदाजे नऊ तोळे सोन्याचे दागिने लांबविल्याची घटना आज दुपारी ३.३० वाजण्याच्या दरम्यान घडली. तर संबंधित महिला व इसमाच्या झटापटीत शेतात पडलेले एक तोळा दागीने सापडले आहेत. बोरवडे येथील म्हसोबा मंदिराजवळील गावात प्रवेश करणाऱ्या मुख्य रस्त्यावर भरदिवसा ही घटना घडल्याने परिसरात खळबळ उडाली आहे. विजयमाला पांडुरंग वारके ( वय ७१ मुळ गाव बोरवडे, सध्या राहणार कोल्हापूर ) असे वृद्ध महिलेचे नाव आहे. याबाबत मुरगूड पोलिसांत गुन्हा नोंदवण्याचे रात्री उशिरापर्यंत सुरु होते.
याबाबत अधिक माहिती अशी, कोल्हापुरात राहणाऱ्या विजयमाला पांडुरंग वारके या आपल्या मूळ बोरवडे गावी घरगुती कार्यक्रमानिमित्त येत होत्या. बिद्री बस स्थानकावर उतरल्यानंतर त्या बोरवडेकडे रस्त्याने चालत निघाल्या असताना गावापासून हाकेच्या अंतरावर पाठीमागून आलेल्या अज्ञात इसमाने त्यांचे तोंड दाबून शेजारील उसात त्यांना ओढत नेले. यावेळी त्यांनी ओरडण्याचा प्रयत्न केला असता त्याने तोंडात कापडाचा बोळा घालून वृद्धेला ठार मारण्याची धमकी दिली. त्या इसमाने वारके यांच्या हातातील दोन पाटल्या व एक बिलवर काढून घेतला तर गळ्यातील मोठ्या मण्यांची एक व बारीक मण्यांची एक अशा दोन माळा हिसकावून घेतल्या. नंतर त्याने ऊसातून पोबारा केला.
घटनेनंतर भेदरलेल्या वारके यांनी मुख्य रस्त्यावर येत आरडाओरडा केला. परंतु तोपर्यंत तो इसम पसार झाला होता. याबाबत मुरगूड पोलिसांना माहिती समजताच त्यांनी घटनास्थळी भेट देत त्या इसमाचा ग्रामस्थांच्या मदतीने शोध घेण्याचा प्रयत्न केला परंतु तो आढळून आला नाही. अधिक तपास पोलिस निरीक्षक गजानन सरगर व त्यांचे सहकारी करत आहेत. दरम्यान रात्री उशिरा पोलिस उपअधिक्षक संकेत गोसावी यांनी घटनास्थळी भेट देऊन पाहणी केली आणि तपासाबाबत सूचना दिल्या.
बोरवडे ते बिद्री कारखाना या मार्गावर अनेक लोकांची ये-जा सुरू असते. लोकांच्या वर्दळीने आणि वाहतुकीने हा मार्ग नेहमीच गजबजलेला असतो. गजबजलेल्या रस्त्यावरच ही घटना घडल्याने लोकांच्यामध्ये भीतीचे वातावरण पसरले आहे
.
