राष्ट्रवादीच्या वर्धापनदिनास जिल्ह्यातून पाच हजार कार्यकर्ते पुण्याला जाणार : हसन मुश्रीफ ; स्थानिक स्वराज्य संस्थांच्या निवडणूकीसाठी सज्ज रहा
कोल्हापूर प्रतिनिधी : विजय मोरबाळे
राष्ट्रवादी काँग्रेस पक्षाच्या मंगळवारी दि. १० पुण्यात बालेवाडी येथे होणाऱ्या वर्धापन दिन कार्यक्रमास कोल्हापूर जिल्ह्यातून पाच हजाराहून अधिक कार्यकर्ते जाणार आहेत, असे प्रतिपादन वैद्यकीय शिक्षण मंत्री हसन मुश्रीफ यांनी केले. दरम्यान; येत्या स्थानिक स्वराज्य संस्थांच्या निवडणुकांमध्ये महायुतीचा झेंडा फडकेल आणि यामध्ये राष्ट्रवादी काँग्रेस पार्टी अव्वलस्थानी राहील यासाठी कंबर कसून प्रयत्न करा. त्यासाठी हाडाची काडं आणि रक्ताचं पाणी करण्यासाठी सज्ज रहा, असे आवाहनही त्यांनी केले.
राष्ट्रवादी कॉग्रेसचा मंगळवारी (दि. १०) पुण्यात बालेवाडी स्टेडियममध्ये वर्धापन दिन होत आहे. त्याच्या तयारीसाठी शुक्रवारी शासकीय विश्रामगृहात कोल्हापूर जिल्ह्यातील प्रमुख पदाधिकाऱ्यांची बैठक आयोजित केली होती. त्यामध्ये मंत्री श्री. मुश्रीफ बोलत होते. यावेळी, ‘गोकुळ’चे अध्यक्ष नविद मुश्रीफ यांचा सत्कारही करण्यात आला.
यावेळी बोलताना मंत्री श्री. मुश्रीफ पुढे म्हणाले, गेली तीन वर्ष स्थानिक स्वराज्य संस्थांच्या निवडणूका हाेऊ शकलेल्या नाहीत. आगामी काळात निवडणूकीची प्रक्रिया सुरु हाेणार असून निवडणूक आयोगाने प्रभाग रचना करण्याचे आदेश दिलेले आहेत. त्या संबंधात त्या त्या वेळी बैठका घेऊन नियोजन करूच. स्थानिक स्वराज्य संस्थांच्या येत्या निवडणुकांसाठी कार्यकर्त्यांनी सज्ज रहावे. या संस्थांवर महायुतीचा झेंडा फडकवत असताना त्यामध्ये राष्ट्रवादी कॉग्रेस पक्ष अव्वल कसा राहील यासाठी प्रयत्नशील रहा, असे आवाहनही श्री. मुश्रीफ यांनी केले.
माजी आमदार श्री. के. पी. पाटील म्हणाले, राष्ट्रवादी काँग्रेस पक्ष हा गोरगरिबांसाठी झटणारा पक्ष आहे. पक्षीय संघटनेच्या वाढीसाठी कंबर कसून काम करूया.
महाराष्ट्रात अजितदादा ; कोल्हापूरात मुश्रीफ…..!
माजी आमदार के. पी. पाटील म्हणाले, संपूर्ण महाराष्ट्रभरच्या कार्यकर्त्यांसाठी उपमुख्यमंत्री अजितदादा पवार आणि कोल्हापूर जिल्ह्यातील कार्यकर्त्यांसाठी मंत्री हसनसाहेब मुश्रीफ हे आम्हा सर्वांच्या पाठीशी हिमालयासारखे ठाम उभे आहेत.
यावेळी माजी आमदार के. पी. पाटील, मानसिंगराव गायकवाड, गोकुळ दूध संघाचे संचालक युवराज पाटील, राष्ट्रवादीचे कोल्हापूर जिल्हा कार्याध्यक्ष अनिल साळोखे, गोकुळ दूध संघाचे नूतन अध्यक्ष नवीद मुश्रीफ, केडीसीसी बँकेचे संचालक प्रताप उर्फ भैया माने, शिरोळचे माजी नगराध्यक्ष अमरसिंह माने- पाटील, गोकुळ दूध संघाचे संचालक प्रा. किसन चौगुले, केडीसीसी बँकेचे संचालक रणजीतसिंह पाटील, भोगावतीचे माजी अध्यक्ष धैर्यशील पाटील- कौलवकर, राष्ट्रवादीच्या महिला जिल्हाध्यक्ष सौ. शितल फराकटे, राष्ट्रवादीचे कोल्हापूर शहराध्यक्ष आदिल फरास, शहराध्यक्षा श्रीमती रेखा आवळे, राष्ट्रवादी युवकचे जिल्हाध्यक्ष नितीन दिंडे, गोडसाखरचे अध्यक्ष प्रकाशभाई पताडे, बाजार समितीचे माजी अध्यक्ष सूर्यकांत पाटील, मधुकर जांभळे, प्रदेश उपाध्यक्ष सौ. जहीदा मुजावर आदी प्रमुख उपस्थित होते.
